BISTEK AT JOY WAGI SA KYUSI

Bistek at Joy B. wagi sa Quezon City, local candidates naiproklama na
Nina Angie Dela Cruz, Danilo Garcia, Doris Franche at Lordeth Bonilla
(Pilipino Star Ngayon) 
May 12, 2010 12:00 AM


Maagang naiproklama ang mga lokal na kandidato sa Metro Manila.
Sa Quezon City pormal nang naiproklama kahapon ng umaga si Herbert Bau­tista bilang Mayor at si Ma. Josefina “Joy “ Belmonte bi­lang vice mayor sa lungsod.
Kapwa nakakuha ng landslide number ng boto sina Bistek at Joy B., kapwa ng Liberal Party.
Si Bistek ay nakakuha ng botong 497,965 habang ang kanyang kalabang si Michael Defensor ay naka­kuha lamang ng 126,246 votes. Si Joy ay nakakuha ng botong 501,129 at ti­nam­bakan ang kanyang katunggaling si Aiko Me­lendez na nakakuha la­mang ng 121,941 na boto.
Bukod kina Bistek at Joy, naiproklama na rin si Mayor Feliciano “SB” Bel­monte bilang congressman ng 4th district ng Quezon City (99,474 votes), Bing­bong Criso­logo sa district 1, Winston Castelo sa District 2 at Bolet Banal sa District 3.
Sa kanyang panig, si­nabi ni Bautista na prayo­ridad pa rin ng kanyang tang­gapan na mapaunlad ang kabuhayan ng mga taga-Quezon City.
Ayon naman kay Joy Belmonte na bibigyan niya ng prayoridad ang pag­sentro sa programang pang kalusugan, edukas­yon, social services at pangka­buhayan, gayundin ay ang pagpapatuloy sa mga napa­simulang pro­grama ng kanyang ama noong al­kalde pa ng lunsod.
Pinasalamatan din ng mga ito ang kanyang mga taga-suporta na patuloy na naniniwala sa kanilang kakayahan para mapa­unlad ang mga taga QC.